Өлкөдө ВИЧти жуктуруп алгандардын саны былтыркыга салыштырмалуу азаюуда

Кыргыз өлкөсүнүн аймагында адамдын иммуножетишсиздигинин вирусун (ВИЧ) жуктуруп алгандардын саны былтыркыга салыштырмалуу азайды. Бул тууралуу маалымат жыйынында "СПИД" республикалык борборунун мониторинг жүргүзүү жана анын сапатын аныктоо бөлүмүнүн адиси Замира Тилекова билдирди.

Анын айтымында, учурда ВИЧти жуктуруп алгандардын көбү 40 жашка чейинкилер.

"Учурда ВИЧке кабылгандардын саны 7803 адамды түзөт. Ооругандардын көбү 20 жаштан 40 жашка чейинки адамдарды түзөт. ВИЧ негизи жыныстык катнаш, баңгизат колдонуу учурунда ийне саюу, балага эмчек эмизүү учурунда жугат. Буга байланыштуу биз тараптан көп жумуштар аткарылууда. Алгач ВИЧти жуктуруп алган адамдарды аныктап, аларга дарыланууга жардам берүү. Алар үчүн атайын дарылар бекер берилет. Дарылануудан кийин айыгып кеткендер бар", - деди Тилекова.

Ошондой эле Замира Тилекова, өлкөдө ВИЧти жуктуруп алгандардын көбү Чүй облусунда экенин айтты.

"Статистика боюнча быйыл 2016-жылга караганда ВИЧке кабылган адамдардын саны азайган. Чүй облусунда 2016-жылы 263 адам аныкталса, быйыл 2017-жылы 231 адам аныкталган. Ош шаарында 2016-жылы 100 адам, 2017-жылы 84 адам. Бишкек шаарында 2016-жылы 129 адам, 2017-жылы 108 адам аныкталды", - дейт адис.