Депутат: "Мектептер окуучулардан 5000 сомдон мүчөлүк акы катары каражат чогултуп жатат"

Бүгүн, 23-ноябрда Жогорку Кеңештин жалпы жыйынында депутат Жыргалбек Калмаматов Бишкекте мектептер окуучулардан 5000 сомдон мүчөлүк акы катары каражат чогултуп жатканын айтты. Депутат өкмөттүн өкүлүнө кайрылып, бул маселеге көңүл буруу шарт экенин билдирди.

"Бишкекте мектептер көп. Мисалы, №12-мектепте ар бир окуучудан "мүчөлүк акы" деп 5 миң сомдон акча алып жатышат. Бүгүн ата-энелер мага кайрылышты. Эгер бир мектепте 2000 окуучу окуп жаткан болсо, бир эле мектеп 10 миллион сом чогултуп алат экен. Бүгүнкү күндө оңдоо иштери, китеп сатып алуу жана башкаларга деп бүт окуучулардан акча чогултуп алып жатат. Мындан тышкары "мүчөлүк акы" деп акча чогултканын кандай түшүнсөк болот? Учурда билим берүү тармагына өкмөт акча берип, жардам көрсөтүп жатат. Ошондуктан бул туура эмес деп ойлойм", - деди Калмаматов.