Түркиянын бийлиги Фетхуллах Гүлендин 22 өлкөдөгү тарапташтарын өткөрүп берүүнү талап кылат

Түркиянын бийлиги Фетхуллах Гүлендин 22 өлкөдөгү тарапташтарын Түркияга өткөрүп берүүнү талап кылат. Бул тууралуу Түркиялык басылмалар жазып чыгышты.

Маалыматка ылайык, Анкаранын Төртүнчү кылмыш сотунун өтүнүчү боюнча Түркиянын Юстиция министрлиги АКШда жашаган диний аалым Фетхуллах Гүленди жана анын 22 өлкөдөгү 44 тарапташын өткөрүп берүүнү талап кылат.

Ошондой эле маалыматта ал тизмеде Германия, Улуу Британия, Нидерланды, Бельгия, Норвегия, Түркмөнстан, Өзбекстан, Казакстан өлкөлөрүнүн бар экени, аталган тизмени Кыргыз өлкөсү да толуктай турганы айтылат.

Айта кетсек, өткөн жылдын 15-июлунан 16-июлуна караган түнү козголоңчулар Түркияда бийликти басып алууга аракеттенген. Бирок алардын аракети ишке ашпай, мамлекеттик төңкөрүштө 290 адам мерт болуп, козголоңду уюштурууга тиешеси бар делип 26 миңдей адам кармалган.

Түрк бийлиги төңкөрүш аракетине Гүленди күнөөлөп, АКШдан аны экстрадиция кылууну суранган. Бирок дин аалымы көтөрүлүштү сынга алып, ага тиешеси жок экендигин айтып чыккан. Гүленди кайтаруу боюнча Түркиянын өтүнүчүн Америка дагы деле аткара элек.