Сооронбай Жээнбеков президенттик аппараттын жетекчилиги менен биринчи кеңешмесин өткөрдү

Бүгүн, 24-ноябрда президент Сооронбай Жээнбеков президенттик аппараттын жетекчилиги менен биринчи кеңешмесин өткөрдү. Бул тууралуу президенттик аппараттын басма сөз кызматы билдирди.

Маалыматка ылайык, президент өлкөнү туруктуу өнүктүрүү стратегиясын 2018-жылдын 15-февралына чейин иштеп чыгып, бүтүрүү керектигин эскертти. Ал белгилегендей, 2018-2040-жылдарга карата туруктуу өнүктүрүүнүн улуттук стратегиясы келе жаткан жылдын февраль айынын аягында кабыл алынышы керек.

Мындан тышкары Жээнбеков жакын арада коррупцияга каршы күрөшүүнүн негизги багыттарын белгилеген Коопсуздук кеңешинин отурумун өткөрүү тапшырмасын берди. “Өлкөдө акыркы жылдары коррупцияга каршы аёосуз күрөш жүрдү. Ал өлкөнү коррупциялык көрүнүштөрдөн тазалоого бардык шарттарды түздү. Биз коррупцияга каршы күрөштү улантышыбыз керек”, - деди мамлекет башчы.