Муфтият: "Өлкөдө мечиттердин имамдары жана дин өкүлдөрү жол кырсыктарын алдын алуу боюнча насаат айта башташты"

Муфтият мечиттерде жана эл көп чогулган жайларда дин өкүлдөрү тарабынан жол кырсыктарын алдын алуу боюнча насаат иштерин жүргүзүүгө багытталган буйрук чыгарды. Мындан улам учурда өлкөнүн бардык аймактарында мечиттердин имамдары жана дин өкүлдөрү бул багытта түшүндүрүү жана насаат иштерин жүргүзүүдө.

Бул тууралуу SUPER.KG`ге муфтияттын басма сөз кызматынын башчысы Максат Атабаев билдирди.

"Акыркы учурларда жол кырсыктары кескин түрдө өсүүдө. Андыктан имамдар менен дин өкүлдөрү бул көрүнүштүн алдын алуу боюнча жума намазы окулган мечиттерде адам өмүрүнүн баалуулугун айтып, такси кызматын аткарган айдоочулар жүргүнчүлөрдүн өмүрү үчүн жооптуу экендиги боюнча насаат иштерин жүргүзүшүүдө. Түшүндүрүү иштери мечиттерде гана эмес, эл көп чогулган коомдук жайларда да өтүүдө", - деди Атабаев.