Сальвадорлук боксчу беттеш учурундагы соккудан улам көз жумду

24 жаштагы сальвадорлук боксчу Франсиско Руис беттеш учурундагы соккудан улам көз жумган. Бул тууралуу BoxingScene басылмасы жазып чыкты.

Маалым болгондой, 18-ноябрь күнү Сан-Сальвадордо Дүйнөлүк бокс ассоциациясынын колдоосу менен беттеш өткөн. Анда Руис менен атаандашы Рикардо Кортес рингге чыгып, 8-раундда Кортес Руисти көздөй сокку жасаган. Жыйынтыгында Руис башы менен катуу кулап, эсин жоготкон. Ал жактагы дарыгерлердин жардамынан натыйжа чыкпагандыктан дароо жергиликтүү ооруканалардын бирине жеткирилген. Дарыгерлер жасалма дем алдыруучу аппаратты колдонушканы менен, боксчу бир канча күн эсине келген эмес. Кийин дарыгерлер спортчунун баш мээси иштебей токтоп калганын байкашкан соң, жигиттин жакындарынын макулдугу менен жасалма дем алдыруучу аппаратты өчүрүшкөн.

Белгилүү болгондой, спортчуну акыркы сапарга узатуу зыйнатын жана ага керектелүүчү каражатты Дүйнөлүк бокс ассоциациясы өз моюнуна алат.

Франсиско Руис - карьерасында алгачкы жолу 8 раунддук беттешке чыккан. Ал буга чейин 4 раунддан турган 3 беттеште ийгиликке жетишкен.