Индияда операция учурунда 35 жаштагы кишинин ашказанынан 7 килограмм темир табылды

Индиянын Санта шаарындагы бейтапканалардын биринен дарыгерлер 35 жаштагы эркек кишиге операция жасашып, анын ашказанынан 7 килограмм темир-тезек табышты. Бул тууралуу кечээ, 26-ноябрда чет өлкөлүк басылмалар жазып чыгышты. Алардын маалыматына таянсак, Максуд Хан аттуу жаран ооруканага ашказаны ооруп жатканын айтып кайрылган.

“Операция учурунда биз бейтаптын ашказанынан темир тыйындарды, мыктарды жана бурамаларды таптык. Мындай укмуштуу окуяга буга чейин күбө болгон эмеспиз”, - деп белгилеген хирургдардын бири Прянк Шарма. Дарыгерлердин айтымында, Максуд Хандын ашказанынан 263 тыйын жана 100гө чукул мык, бурамалар табылган. Ошондой эле ал психикалык жактан жабыркайт. Ал эми Максуддун туугандары билдиргендей, ал кардарларды велосипед менен ташып жан багат жана көпчүлүк учурда кардарлары ага жол акысын тыйын менен төлөшөт. Соңку учурларда Максуд депрессияга кабылып, андан чыгуу үчүн майда-чүйдө темирлерди жей баштаган. Азыркы тапта анын ден соолугу турукташып калган жана дарыгерлерге мындан ары темир-тезекти “тамак-аш” катары колдонбоо тууралуу убада берген соң үйүнө чыгарылган.

Эске салсак, буга чейин да Индиялык хирургдар психикалык жактан жабыркаган бейтаптын ашказанынан 600дөй мык алып чыгышкан.