Министрлик: "Өлкөдөгү окуучулардын кыздыгын аныктоо үчүн гинекологиялык текшерүү жүргүзүлбөйт"

Кыргыз Республикасындагы айрым мектептердин администрациясы жогорку класста окуган кыздардын жыныстык катнашка барып, барбаганын аныктоо үчүн гинекологиялык текшерүүдөн өткөрүп жатканын өлкөдөгү айрым ММКлар жазып чыгышты.

Бул тууралуу Билим берүү жана илим министрлигине кайрылганыбызда, ал маалыматты төгүндөштү.

"Бизде атайын өзүнчө гинекологиялык текшерүү жүрбөйт. Бирок жылына бир жолу окуучулар жалпы медициналык текшерүүдөн өтүп турушат", - деп билдиришти министрликтен.

Буга чейин Өзбекстандагы айрым жалпыга маалымдоо каражаттары жогорку класста жана колледждерде окуган кыздардын кыздыгы бар же жогун аныктоо үчүн массалык түрдө гинекологиялык текшерүүдөн өткөрүлүп жатканын жазып чыккан.

Ошондой эле маалыматта, мындай иш-чара жаш кыздар арасындагы суицидди алдын алууга багытталганы айтылат.