Грек-рим күрөшү боюнча Кыргыз курама командасынын башкы машыктыруучусу Канатбек Бегалиев кызматынан бошотулду

Грек-рим күрөшү боюнча Кыргыз курама командасынын башкы машыктыруучусу Канатбек Бегалиев кызматынан бошотулду. Бул тууралуу SUPER.KG порталына Жаштар иштери, дене тарбия жана спорт агенттигинен билдирди.

Маалыматка караганда, грек-рим күрөшү боюнча Кыргыз курама командасынын башкы машыктыруучусу Канатбек Бегалиев, өз каалоосу боюнча 18-октябрда кызматынан бошотулган. Ал бул кызматка 2012-жылы дайындалып, 2017-жылдын январь айында "Токио-2020" Олимпиадасына чейин кайрадан башкы машыктыруучусу кызматына шайланган.

Канатбек Бегалиевдин баштоосунда Кыргыз курама командасы "Рио-2016" Олимпиада оюндарына 4 жолдомого ээ болгон. Анда Кыргыз курама командасынын балбаны Арсен Эралиев 5-орунду ээлеген.

Эске салсак, Канатбек Бегалиев 2008-жылы Пекинде өткөн Олимпиада оюндарында күмүш медаль жеңип алган.