Конфедерациялар Кубогу клубдар арасындагы Дүйнөнүн Суперкубогуна алмашат

Эл аралык футбол федерациясы (ФИФА) Конфедерациялар Кубогун клубдар арасындагы Дүйнөнүн Суперкубогуна алмаштырат. Бул тууралуу чет элдик басылмалар жазышты.

Маалыматка ылайык, аталган мелдеш 4 жылда бир жолу өтүп, ага Дүйнөнүн 6 континентинен 24 команда катышат. Алардын 12си Европа континентинен. Чемпиондор Лигасынын жана Европа Лигасынын акыркы 4 жеңүүчү командалары. Калган 4 команда УЕФАнын рейтингине жараша тандалат.

Ал эми Түштүк Америкадан атактуу 5 клуб катышса, Азия, Түндүк Америка жана Африкадан 2 клубдан катышат.

Айта кетсек, Конфедерациялар Кубогу Дүйнө чемпиондугуна бир жыл калганда өтүп, ага даярдык катары эсептелчү. Жалпысынан 8 команда катышат. Алар: үй ээси, Дүйнө, Европа, Азия, Түштүк Америка, Түндүк Америка, Океания жана Африканын чемпиондору.

Эске салсак, 2017-жылы Конфедерациялар Кубогу Орусияда өтүп, анда Германия курама командасы жеңишке жеткен.