"ЭЛДИК КАБАРга" жооп: "Бишкектеги негизги стадиондо отургучтар чоң мелдештин алдында тазаланып турат"

"Элдик кабар" рубрикасына окурман "Бишкектеги негизги стадиондо отурарга таза орун жок" деп билдирген.

"Бул эл аралык деңгээлдеги беттештер. Ушундай беттештерде футболду көргөнү келген көрүүчүлөргө шарт түзүп бербесе да, жок дегенде отургучтарды жууп коюшса болмок. Кайсы жерге отурарыңды билбейсиң. Чымчыктар булгап кеткен, чаңы болсо бир эли. Келген коноктордон уяласың. Ушинтип отурсак өлкөдө спорт өнүкмөк беле?" - дейт окурман.

Жаштар иштери, дене тарбия жана спорт агенттигинин коомчулук менен байланыш бөлүмүнүн башчысы Нурдин Султамбаев борбордук стадиондогу отургучтар чоң мелдештин алдында тазаланып турат деп билдирди.

"Көп күйөрман келе турган иш-чаралардын алдында стадион толугу менен тазаланып отургучтар жуулат. Ошондой эле аба ырайына байланыштуу стадиондогу отургучтардын абалы начарлоодо. Жайында күнгө күйүп, кышында тоңгондон улам сыныктар пайда болууда. Абалы начар болуп калган отургучтарды атайын түзүлгөн комиссия карап чыгып, аларды алмаштырат. Андан тышкары күйөрмандардын начар тартибин оңдош керек, айрым көрүүчүлөр отургучтардын үстүнө чыгып алышат", - дейт Нурдин Султамбаев.