Башкы прокуратура: "Тарых музейинде жоголгон экспонаттар боюнча үч кылмыш иши козголуп, токтоп турат. Конкреттүү эч нерсе табыла элек"

"Тарых музейинде жоголгон баалуу тарыхый экспонаттар боюнча үч кылмыш иши козголуп, токтоп турат", - деди Башкы прокуратуранын тергөө иштери боюнча көзөмөлдөө бөлүмүнүн башчысы Мухамед Карашев.

"Бишкек шаарындагы Биринчи Май райондук ички иштер башкармалыгы тарабынан эки кылмыш иши козголгон. Кылмыш иштери Тарых музейи жана мемориалдык "Фрунзе" музейинде жоголгон экспонаттар боюнча козголгон. 2017-жылдын 18-майында Эсептөө палатасынын берген маалыматтары боюнча Каржы полициясы да иш козгогон. Бул бардык экспонаттар боюнча Эсептөө палатасынын бүтүмүнө ылайык козголду. Тергөө иштери жүргөн, бирок азыр иштер токтоп турат. Учурда кайра териштирип чыгуу боюнча тапшырмалар берилди. Конкреттүү эч нерсе табыла элек", - деди Карашев.

Белгилей кетсек, бүгүн, 1-декабрда Жогорку Кеңештеги "Ата Мекен" фракциясы Тарых музейинде жана мамлекеттик мемориалдык музей үйүндө жоголгон баалуу тарыхый экспонаттар боюнча маселени карады.