Футбол боюнча Кыргыз өлкөсүнүн олимпиадалык курама командасы ири эсепте Бруней курамасын жеңип алды

Бүгүн, 4-декабрда Индонезияда өтүп жаткан "Tsunami Cup-2017" футболдук мелдешинин алкагында Кыргыз өлкөсүнүн олимпиадалык курама командасы Бруней курама командасы менен туш келип ири эсепте жеңишке жетти.

Жаан менен коштолгон беттеште Кыргыз курамасы алгачкы мүнөттөрдөн баштап топко ээ болуп, натыйжалуу чабуул жасады. Беттештин 1-мүнөтүндө Антон Землянухин эсеп санын ачканга үлгүрдү. 32-мүнөттө команданын капитаны Азамат Байматов таамай сокку менен эсепти 2:0 кылды. 2-таймда Бруней курамасынын коргоочулары айып аянтчанын ичинде Бекжан Сагынбаевди жыгылткан соң калыс пенальти аткарууну дайындады. Пенальтини Азамат Байматов аткарып, таамай сокку менен эсепти 3:0 кылды. 60-мүнөттө Кадырбек Шаарбеков мыкты сокку менен беттештеги жыйынтыктоочу голду киргизди.

Муну менен Кыргыз өлкөсүнүн олимпиадалык курама командасы 2-ирет жеңишке жетип турнирдик жадыбалда 1-орунга көтөрүлдү.

Кийинки беттеште 6-декабрда Кыргыз курама командасы Индонезия менен кез келет.

Кыргыз өлкөсү-Бруней 4:0

Голдор: Антон Землянухин (1-мүнөттө), Азамат Байматов (32, 55), Кадырбек Шаарбеков(60).