Жерде жаткан баласын тепкен ата жумушунан бошотулду

Жерде жаткан кичинекей баласын тепкен ата жумушунан бошотулду. Бул тууралуу бүгүн, 5-декабрда Мамлекеттик каттоо кызматынын басма сөз кызматы билдирди.

Белгилүү болгондой, баланын атасы Бариер Адиев буга чейин Сокулук райондук Мамлекеттик каттоо кызматында жетекчинин орун басары болуп иштеп келген. Коомчулукка тараган видеодон соң Мамлекеттик каттоо кызматынын төрагасы Дастан Догоев аны жумушунан бошотуу боюнча буйрук чыгарган.

Эске салсак, 2-декабрда интернетке эркек кишинин жерде жаткан кичинекей баланын белине тээп жаткан видеосу жарыяланган. Бул окуя социалдык түйүндөрдө кызуу талкууланып, ошол эле күнү кичинекей баланы тепкен адамдын кармалганы тууралуу Бишкек ШИИББинен билдиришкен. Тергөө иштеринин жүрүшүндө ал баланын атасы экендиги аныкталган. Андан соң Бишкек шаарынын Октябрь райондук соту баланы тепкилеген атаны убактылуу кармоочу жайга 2 айга камакка алган.