Жогорку Кеңештин комитети эреже бузган айдоочуларды эркинен ажырата турган мыйзамды үчүнчү окууда жактырды

Бүгүн, 5-декабрда Жогорку Кеңештин укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин жыйынынын жол кырсыктарын азайтууга багытталган мыйзамдын долбоору үчүнчү окууда колдоо тапты. Мыйзам Дастан Бекешев тарабынан сунушталган. Анда айдоочулардын жоопкерчилигин күчөтүү нормалары сунушталууда.

Мыйзам долбооруна ылайык, айдоочу жабырлануучунун ден соолугуна анча оор эмес зыян келтирсе, 3 жылга чейин автоунаа башкаруу укугунан ажыратылып, 3 жылга чейин эркинен ажыратылат.

Эгерде автокырсык жабырлануучунун өлүмүнө алып келсе 3 жыл айдоочулук укугунан ажыратуу менен 5 жылга чейин эркинен ажыратылат.

Эгер бир нече адам каза болсо 3 жылдан 5 жылга чейинки мөөнөткө эркинен ажыратуу каралат.

Ал эми айдоочу мас абалында жол кырсыгына кабылса, 3 жылга чейинки мөөнөткө белгилүү кызматты ээлөөгө тыюу салуу же айыпка жыгуу, же иш жүргүзүү укугунан ажыратуу менен 5 жылга чейин эркинен ажыратууга жазаланат.

Жогорку Кеңештин комитети эреже бузган айдоочуларды эркинен ажырата турган мыйзамды үчүнчү окууда жактырды. Эми мыйзам долбоору Жогорку Кеңештин жалпы жыйынында үчүнчү окууда каралат.