АКШда 16-президенттин мемориалына өз атын жазып койгон Кыргыз жаранынын иши сотто каралууда

Вашингтон шаарында АКШнын 16-президенти Авраам Линкольндун мемориалына "Нуртилек" деп өз атын жазып койгон Кыргыз жаранынын иши соттун кароосунда турат. Тышкы иштер министрлигинин расмий өкүлү Айымкан Кулукееванын билдиришинче, сот отуруму кайсы күнгө белгиленгени азырынча белгисиз.

"21 жаштагы Кыргыз жараны Нуртилек Бакиров сотко келип турууга милдеттендирилип, үйүнө коё берилген. Шаардык сот келтирилген чыгымды 2 миң доллар деп баалаган. Вашингтон шаарындагы биздин консулдук кызмат Нуртилек менен ар дайым байланышта болууда", - деди Кулукеева.

Нуртилек Авраам Линкольндун мемориалына өз атын жазганы үчүн 18-сентябрда кармалып, эртеси соттун чечими менен үй камагына чыгарылган.

Айта кетсек, Авраам Линкольн 1809-жылы 12-февралда АКШнын Кентукки штатынын Гардинг округунда жашаган Томас жана Ненси Хэнкс Линкольндордун үй-бүлөсүндө төрөлгөн. Ал 1861-жылы АКШнын 16-президенти болуп шайланып, ал АКШнын Конституциясына көптөгөн кошумчаларды киргизип, кулчулукту түп-тамыры менен жойгон.