Анжелина Жолиге окшошуу үчүн 50 жолу пластикалык операция жасаткан делген кыз бул маалыматты четке какты

Голливуддун белгилүү актрисасы Анжелина Жолиге окшошуу үчүн 50 жолу пластикалык операция жасаткан делген ирандык кыз Сахара Табар жогоруда аталган маалыматты четке какты. Бул тууралуу чет элдик маалымат булактары жазып чыгышты.

Белгилүү болгондой, Сахара буга чейин бир канча ирет пластикалык операцияны баштан кечирген, бирок 50 эмес. Ошондой эле анын интернетке жайылган түрү суук сүрөттөрү операциянын жыйынтыгы эмес, атайын макияж менен жасалган.

"Чынын айтсам, азыркы учурда боёктун жардамы менен каалагандай келбет тартып алса болот. Бирок ушундай жетишкендик заманда бул сүрөттөрдөгү келбетимди операциянын жыйынтыгы деп беришкен айрым маалымат булактарына абдан таң калдым. Биз эмне макияж менен технология жөнүндө түшүнүк калыптана элек XVIII кылымда жашап жатабызбы?" - деген ал.

Белгилей кетсек, буга чейин чет элдик маалымат каражаттарында 20 жаштагы ирандык кыз Анжелина Жолиге окшошуу үчүн 50 жолу пластикалык операция жасаткан деген маалымат тараган.