Жарнамаларда ката кетирилгени үчүн 5 миң сомго чейин айып пул салынып башташы мүмкүн

Кыргыз Республикасында мазмуну боюнча адабий тилдин ченемдери сакталбаган жарнамаларды жайгаштыруу үчүн айып пул салуу сунушталды. Тиешелүү мыйзам долбоорун Жогорку Кеңештин депутаты Эмил Токтошев ("Ата Мекен") демилгеледи.

Долбоорго ылайык, шаардагы, айылдагы, калктуу конуштарда мазмуну боюнча адабий тилдин ченемдери (алфавит жана орфография эрежелери) сакталбаган жарнамаларды жайгаштырган жарандарга 500-1000 сом, юридикалык жактарга 2000-5000 сом өлчөмүндө айып салынат.

Мындан тышкары жарандардын тарбиялоодо жана окутууда тилди эркин тандап алуу укугун бузган, тилди пайдаланууга тоскоолдуктарды жана чектөөлөрдү койгон, мамлекеттик тилге, ошондой эле Кыргыз Республикасында жашаган улуттар менен элдердин тилдерине тоготпой мамиле кылган, тил жөнүндө мыйзамдарда каралган ченемдерди бузган жана аткарбаган кызмат адамдарына 2000-5000 сом өлчөмүндө айып салуу сунушталууда. Ал эми ушул эле аракеттер үчүн жарандарга 500-1000 сом, юридикалык жактарга 2000-5000 сом өлчөмүндө айып салууга алып келет.

"Республикабыздын шаарларында жана аймактарында көчөлөрдөгү, имараттардагы кулактандыруулар, маалыматтар, мамлекеттик жана жеке ишканалардын аталыштары чар-жайыт жазылып келүүдө. Мындай мүчүлүштүктөрдү ар бир айыл, шаарларда кезиктирүүгө болот. Аларды мыйзам талабына ылайык келтирүү боюнча укукту жергиликтүү органдарга берүү зарыл", - деп демилгесин түшүндүрдү Токтошев.