Кенже Көбөкова: "Мен жаздырган ыр менен тойдо кызмат кылып жүргөн "ырчы" кечирим сурайт деп ойлойм"

Кенже Көбөкова интернеттеги жеке баракчасына "Кечирип кой" аттуу ырын тойдо башка кыздын "аткарып" жаткандагы видеосун жарыялаган. Анда ал: "Сиңдимсиңби, курбумсуңбу билбейм. Бирок өзүң келип кечирим сурайсың деп ишенем. Менин үнүм менен, мен жаздырган ырды "ырдап" жатасың. Канча эл күбө. Менден башка дагы канча ырчынын үнүн пайдаланасың ким билет?" - деп жазган.

Видеодон улуттук кийим кийген кыздын "Кечирип кой" аттуу ырды "аткарып" жатканын көрүүгө болот. Көбөкованын билдирүүсү талкууга алынып, "мындай кадамга барган "ырчы" ким?" деп суроо салгандар көбөйдү.

SUPER.KG порталы Кенже Көбөковага байланышып, бул видео тууралуу маалымат алды. Анын айтымында, видеону ал интернеттен көргөн, кийин тааныштары ага "сенин үнүңдү, эмгегиңди уурдаптыр" деп жөнөтүшкөн.

"Аябай таң калдым, бул эми уурулук да, экинчиден элди алдап жатат. Кыздын аты-жөнүн билбейм, тапкан жокмун. Эгер уялса өзү келип кечирим сурайт деп жатам. Укканым боюнча, ошол тойдо Манас Алыкулов тамада болгон экен. Бул ырдын сөзү, обону Замирбек Үсөнбаевге таандык, уруксат алып ырдай берсин, бирок менин жаздырып койгон ырымды, менин үнүм менен пайдаланып акча тапканы такыр акылга сыйбаган иш. Ал кыз менин даяр ырыма фонограмма аткарып эле тим болбостон, ырчы Азиза жаздырган "Жар-жар" ыры менен үйлөнүп жаткан түгөйлөрдү ресторанга коштоп кириптир", - дейт Көбөкова.

Ал кошумчалагандай, "Кечирип кой" деген бул ырды ал 2014-жылы жаздырган. Ага жалпы 400 доллар каражат жумшалган.

Кенже Көбөкова кайрылуу жасаган адамдын оюн угуу үчүн көргөн аракеттерибиз натыйжалуу болгон жок. SUPER.KG порталы экинчи тараптын пикирин угууга даяр.