Биринчи вице-премьер-министр болуп шайланган Аскарбек Шадиевдин өмүр баяны

Бүгүн, 6-декабрда Жогорку Кеңеш биринчи вице-премьер-министр кызматына Аскарбек Шадиевди шайлады.

1-декабрдан баштап күчүнө кирген Баш мыйзамдагы өзгөрүүгө ылайык, Жогорку Кеңештин депутаты биринчи вице-премьер-министр болуп шайланса, анда ал мандатын тапшырбайт. Ошондой эле парламенттин жыйынында добуш берип, депутаттар менен эле тең болуп талкууга катыша алат. Өкмөттөн кетсе депутаттык орду сакталат.

Аскарбек Шадиев 1969-жылы 31-январда Баткен облусуна караштуу Лейлек районундагы Голбо айылында туулган. Ал 1988-жылы Фрунзе Политехникалык техникумун аяктап, гидротехникалык иштер, техника жана механиканын механизациясы боюнча адистик алган. 1993-жылы Кыргыз улуттук университетинин экономика факультетин, 1999-жылы ошол эле университеттин юридика факультетин бүтүргөн.

- 1993-жылы "Сфера" өндүрүш-коммерциялык фирмада башкы бухгалтердин орун басары;

- 1995-жылы "Азнур ЛТД" жоопкерчилиги чектелген коомунун коммерциялык директору;

- 1995-жылы "Корпорация Датка" жоопкерчилиги чектелген коомунун вице-президенти;

- 2000-2002-жылдары Жогорку Кеңештин мыйзам чыгаруу жыйынынын депутаты;

- 2002-жылы каржы министринин орун басары;

- 2002-жылы Каржы министрлигинин алдындагы киреше комитетинин жетекчиси;

- 2003-2005-жылдары Баткен облусунун губернатору;

- 2005-2007-жылдары Жогорку Кеңештин III чакырылышынын депутаты;

- 2007-2010-жылдары Жогорку Кеңештин IV чакырылышынын депутаты;

- 2010-2011-жылдары энергетика министри;

- 2011-2012-жылдары энергетика жана өнөр жай министри;

- 2015-жылы "Бир Бол" партиясынан Жогорку Кеңештин VI чакырылышынын депутаты.