Алмамбет Шыкмаматовдун жактоочусу ооруп калганына байланыштуу соттук отурум башка күнгө жылдырылды

Бүгүн, 6-декабрда Бишкек шаарынын Биринчи Май райондук сотунда Жогорку Кеңештин депутаты Алмамбет Шыкмаматовдун иши каралмак. Бирок анын жактоочусу Чынара Жакупбекованын ооруп, отурумга келе албагандыгына байланыштуу сот башка күнгө жылдырылды. Мурунку отурумда күбөлөр суралып бүткөндүктөн бүгүнкү отурумда жарыш сөз орун алмак.

Айта кетсек, Шыкмаматов жеке кызыкчылыгын көздөп аялынын Мерседес Бенц Е320 үлгүсүндөгү унаасын кымбат баага сатуу үчүн "Барат Люкс" ишканасын тендерге катышкандардын катарына кошууну демилгелеген деп айыпталууда. Ал өзү бул ишти "саясий кысым" деп келет. Аталган тендерге 2 фирма катышып, 2011-жылы 5-октябрда жыйынтыкталган.

Ишти УКМК тергеп, Биринчи Май райондук сотуна өткөрүп берген. Учурда ишти райондук сот карап жатат.