Жаш активисттер Кыргыз жеринде порнографиялык сайттарга тыюу салууну сунушташууда

Жаш активисттер бүгүн, 7-декабрда маалымат жыйын өткөрүп, Кыргыз жеринде порнографиялык сайттарга тыюу салууну сунуштап чыгышты. Алар порнографиялык сайттардын кенен жайылып жатышы жана жаш өспүрүмдөрдүн мындай мазмундагы сайттарга кирип жатышына эч кандай көзөмөл болбой жатканын белгилешти.

Активисттердин бири Жоомарт Теңизбаев ата-энелерди балдарына телефон карматпоого чакырды.

"Азыр ар бири эле балдарына телефон карматып коёт. Албетте, сабактан качан келе турганын, кайда жүргөнүн билүү үчүн берет. Бирок азыр ар бир телефон менен интернетке кирүүгө мүмкүнчүлүк бар. Кайсы бир социалдык баракчага кирбесин жарнамаларда порнографиялык мазмундагы сайттардын шилтемелери бар. Өспүрүм ал сайтка кирет да, өзү каалаган видеону көрөт. Порнографиялык сайттар жаш балдарга өтө терс таасир берип, агрессивдүүлүгүн күчөтөт. Ошондуктан порнографиялык сайттарга тыюу салуу үчүн мыйзам кабыл алуу керек", - деди Теңизбаев.