Премьер-министрге, депутаттарга жана муфтиятка көп аялдуулук маселеси боюнча 6 талап коюлду

Бүгүн, 7-декабрда “Аялдарга карата зомбулукка каршы туруу” кыймылынын мүчөлөрү Бишкекте маалымат жыйын өткөрүп, көп аялдуулук маселеси боюнча пикирлерин билдиришти. Жыйынтыгында өкмөт башчы Сапар Исаковго, Жогорку Кеңештин депутаттарына, муфтиятка, дин иштери боюнча мамлекеттик комиссиясына жана жарандарга 6 талап коюшту.

Коюлган талаптар:

1. Жогорку Кеңеш көп аялдуулукту легализациялоо боюнча мыйзам долбоорун иштеп чыгуу боюнча талаш-тартыш жараткан сөздөрдү токтотсун.

2. Жогорку Кеңеш көп аялдуулуктун алдын алуу боюнча эффективдүү кошумча мыйзам чараларын иштеп чыксын.

3. Үй-бүлөдөгү зордук-зомбулук жөнүндө жаңы мыйзамды илгерилетүү жолу аркылуу маселеге көңүл буруу менен ылайыктуу механизмдерди иштеп чыксын.

4. Кыргыз мамлекетинин Мусулмандарынын Дин башкармалыгы мониторинг жүргүзүү менен көп аялдуулук жана балдардын эрте никеси тууралуу маалымат таркатуусуна Кыргыз Республикасынын мыйзамдарынын бузулушу иретинде бөгөт койсун.

5. Кыргыз Республикасынын жарандары өздөрүнүн кыздарына камкордук көрүү менен, аларга билим алууга жана саламаттыкты сактоого болгон жеткиликтүүлүккө мүмкүнчүлүк түзсүн, алардын экономикалык жактан өз алдынчалыгын колдошсун.

6. Дин маселелери боюнча мамлекеттик комиссия светтиктин калыптанышы боюнча иштерди жүргүзсүн.

Аталган кыймылдын курамында 100дөй адам болсо, алардын арасында Жогорку Кеңештин депутаттары, коомдук ишмерлер, юристтер жана укук коргоочулар бар.