Кыргыз өлкөсү 19 жашка чейин төрөгөн кыз-келиндердин саны боюнча КМШда 2-орунда турат

"Жаш курактагы кыздар токолдукка алынууда. Ага ылайык, башка өлкөлөргө салыштырмалуу биздин кыздар эрте жаш куракта төрөп башташат", - деп билдирди укук коргоочу Назгүл Турдубекова көп аялдуулукка каршы өткөн маалымат жыйында. Анын билдиришинче, энелердин төрөттөн каза болуп жатышына эрте төрөт негизги себептердин бири.

"Көз карандысыз мамлекеттер шериктештигинин мамлекеттер аралык статистика комитетинин маалыматы боюнча 15-19 жашта төрөгөн кыз-келиндердин саны боюнча Кыргыз мамлекети экинчи орунда турат. Биринчи орунда Азербайжан. Энелердин төрөттөн каза болуп жатышына эрте төрөт негизги себеп", - деди Турдубекова.

“Аялдарга карата зомбулукка каршы туруу” кыймылынын өкүлдөрүнүн билдиришинче, ар бир үчүнчү аял үйдөгү зордук-зомбулукка дуушар болуп келет. Бирок мындай кылмыштардын ачылышы өтө төмөн. Кризистик борборлордун ассоциациясынын билдирүүлөрү боюнча үйдөгү зордук-зомбулуктан улам 2015-2017-жылдары 98 аялдын өлүмү катталган.