Бишкекте белгисиз адамдар окуучуларды уурдап жатат деген билдирүүлөр тароодо. Маалыматты милиция тактап жатат

Бишкекте уюшкан топ балдарды уурдап жатат деп WhatsApp аркылуу аудио билдирүү тарап коомчулукту түйшөлтүүдө. Ал билдирүүлөр боюнча тынчсызданган окурмандар бүгүн, 8-декабрда SUPER.KG порталына кайрылышты.

Аталган аудио билдирүүлөрдүн биринде Бишкек шаарынын Аламүдүн-1 кичи районундагы мектептин жанында окуучуну уурдоого аракет кылганда башка адамдар ажыратып калганы айтылат. Дагы биринде ошол эле аймакта башталгыч класстын окуучусун белгисиз адамдар унаасынын багажына салып алып кетишкенин башка окуучулар көрүшкөнү айтылган. Ошондой эле аталган билдирүүлөрдө Бишкекте белгисиз адамдардан турган уюшкан топ окуучуларды уурдап кетип жатышканы кошумчаланган.

Ал эми Бишкек ШИИББинен аталган билдирүүлөр боюнча милиция кызматкерлери тактоо иштерин жүргүзүп жатканын кабарлашты.

"Учурда бул билдирүүлөр боюнча Свердлов райондук ички иштер бөлүмүнүн кызматкерлери тактоо иштерин жүргүзүп жатат. Мындай окуялар чындап эле болгонбу, болсо кайсы жерде болгон, болбосо бул билдирүүлөрдү кимдер таратып жатат тактоо иштери жүрүүдө", - дейт Бишкек ШИИББи.