Өкмөт: "Экологиялык таза мунайга өтүү өлкөдөгү бензиндин баасын 10 сомго чейин жогорулатышы мүмкүн"

Бүгүн, 11-декабрда Жогорку Кеңештеги агрардык саясат, суу ресурстары, экология жана регионалдык өнүктүрүү боюнча комитети өлкөдө ЕАЭБ талаптарына ылайык экологиялык таза мунайга өтүү маселесин карады. Ага ылайык, өлкөдө бензинди евро-5 категориясына 2021-жылга чейин өткөрүү пландалган.

Айлана-чөйрөнү коргоо жана токой чарбасы мамлекеттик агенттигинин директору Абдыкалык Рустамовдун айтымында, өлкөдө унаалардын саны 1 миллиондон ашты. "Бишкекке күнүнө 40 миңге чукул унаа кирет. Учурда кыргыз өлкөсү евро-3 категориясындагы бензинди колдонот. Евро-5те зыяндуулуктун деңгээли учурдагы күйүүчү майдан 50 эсе аз. Бул менен баа көтөрүлөт. Менин оюмча, бул 10 сомго чейин көтөрүлүшү мүмкүн", - деди чиновник.

Талкууда депутаттар Асылбек Жээнбеков, Мирлан Бакиров, Рада Туманбаева таза мунайга өтүүнүн убактысын 2019-жылга жылдырууну сунушташты. Комитет бул сунушту жактырды.

Жээнбековдун айтымында, баалар 10 сомго чейин көтөрүлбөшү керек. "Эң башкысы - ден соолук. 10 сомго кымбат болсо деле, бул жактан 10 сом үнөмдөйбүз деп андан көп нерселерди жоготуп жатабыз. 2019-жылга чейин дагы бир жыл убакыт бар", - деди депутат.