Бүгүн Чемпиондор Лигасынын плей-офф баскычынын чүчү кулак аземи өтөт

Бүгүн, 11-декабрда Швейцариянын Ньон шаарында Чемпиондор Лигасынын плей-офф баскычынын чүчү кулак аземи орун алат. Анда тандап алуу баскычында 1-2-орундарды ээлеген командалардын атаандаштары аныкталат.

Плей-оффто жалпы 16 команда күч сынашып, тайпалык баскычта 1-орунду ээлеген командалар 2-орунду ээлеген командалар менен өз ара беттешет.

Айта кетсек, тайпалык баскычта 1-орунду англиялык "Манчестер Юнайтед", "Ливерпуль", "Манчестер Сити" жана "Тоттенхэм", франциялык "ПСЖ", италиялык "Рома", испаниялык "Барселона" жана Түркиялык "Бешикташ" командалары камсыздаган. Ал эми 2 -орунду Швейцариялык "Базель", германиялык "Бавария", англиялык "Челси", италиялык "Ювентус", испаниялык "Севилия" жана "Реал Мадрид", украиналык "Шахтёр" жана португалиялык "Порту" командалары ээлеген.

Чүчү кулак аземи Ньон шаарындагы УЕФАнын башкы штабында Бишкек убактысы боюнча саат 17:00дө орун алат.

Плей-офф баскычынын алгачкы беттештери 2018-жылдын 13-14-февралында жана 20-21-февралда өтсө, жооптук беттештер 6-7-мартта жана 13-14-мартта өтөт.

Чейрек финалдык беттештер 3-4-апрелде жана 10-11-апрелде өтсө, жарым финалдык беттештер 1-2-майда өтөт.

Чемпиондор Лигасынын финалы 26-майда Украинанын Киев шаарындагы Олимпиадалык стадионунда өтөт.