Министр: "Бишкек-Ош авиабилеттеринин баасын 4000 сомдон ашырбоого бир авиакомпания макулдук бербей жатат"

Жогорку Кеңештин 13-декабрдагы жалпы жыйынында депутат Азамат Арапбаев Бишкек-Ош аба каттамында билет баалары азыркы күнгө чейин өтө жогору болуп жатканын айтты.

"Билет баалары 5000 сомго чыгып кетти. Биз, депутаттар бул маселени ушул жерден далай жолу айттык. Каттамдарды көбөйтүү, билетке болгон бааларды түшүрүү боюнча көп сөздөр айтылды. Бирок маселе чечилбей жатат, кандай чара колдонуп жатасыздар?" - деп депутат транспорт жана жол министри Жамшитбек Калиловдон сурады.

Министр: "Каттамдарды көбөйтүү боюнча биз авиакомпаниялар менен иштеп, маселени чечсек болот. Тарифтер боюнча биз эки авиакомпания менен сүйлөшүп маселени чечтик. 1-декабрдан баштап билеттин эң жогорку баасы 4000 сомдон ашпаш керек. Бир эле "Эйр Манас" компаниясы макулдугун бере элек. Учурда сүйлөшүүлөрдү жүргүзүп жатабыз", - деп жооп берди.