Депутат: "Бишкек-Ош аба каттамдарына билет баасынын өздүк наркы 1200-1800 сом"

Бишкек-Ош аба каттамынын билетинин өздүк баасы 1200-1800 сом. Бул тууралуу Жогорку Кеңештин "Кыргызстан" фракциясынан депутат Кубанычбек Нурматов бүгүн, 13-декабрдагы жалпы жыйында айтты. Ал менчик компаниялар коммерциялык кызыкчылыктар менен билет бааларын жогору коюп жатканын белгиледи.

"Бишкек-Ош жолу жабылды дегенде эле билеттин бааларын көтөрүп алып 5000-6000 сомго чыгып кетип жатат. Билеттин өздүк баасы 1200-1800 сомго чейин эле болчу. Ушуну жакшы көзөмөлгө алыш керек. Элдин кыйналып жатканын көрүп туруп бир-эки компания отуруп алып билеттин баасын көтөрүп жатканы туура эмес. Бул маселени чечиш керек", - деди Нурматов.

"Түркияга жана Үрүмчүгө каттамдарды Ош шаарынан да ачуу керек. Фергана өрөөнү боюнча бул жактарга Өзбекстан, Тажикстан тараптан жарандар транзит аркылуу Бишкектен учуп жатат. Ошондуктан экономикалык жактан ыңгайлуу жагын карашыбыз керек. Ошондо транзит менен бир канча акча тапса болот", - деп кошумчалады Нурматов.