"ЭЛДИК КАБАРга" жооп: Министрлик: "Мамлекеттик бала бакчалардын ата-энелерден акча талап кылууга укугу жок"

"Балдарымды мамлекеттик бала бакчага алып барам. Башында 2 балама 14 миң сом берип атып араң киргизгем. Эми терезе алмаштырабыз деп акча чогултуп жатат", - деп окурман "Элдик кабарга" билдирген.

Мамлекеттик бала бакчалардын ата-энелерден акча талап кылуусу мыйзамдуубу? деген суроонун негизинде, Билим берүү жана илим министрлигинин Билимди өнүктүрүү бөлүмүнүн башчысы Гүлмира Акматовага байланышып, төмөнкүдөй жооп алдык.

"Мамлекеттик бала бакчалар ата-энелерден акча талап кылууга укугу жок. Эгер ата-энелердин атайын түзгөн фонду болуп, алардын макулдугу менен оңдоп-түзөө иштерине акча чогултулса, анда биз эч нерсе дей албайбыз. Макулдугу жок, бала бакчанын директору же мугалимдери тарабынан сөзсүз түрдө акча беришиң керек деген талап же мажбурлоо болуп жатса, анда бизге арыз менен кайрылса болот. Бул маселени тез арада чечип берүүгө даярбыз", - деди ал.