Исаков Жол коопсуздугун камсыздоо башкармалыгынын кызматкерлерине унаанын үстүндө протокол толтуруу ыңгайсыз экенин айтты

Жол коопсуздугун камсыздоо башкы башкармалыгынын кызматкерлеринин ар бирине бирден планшет берилет. Бул тууралуу бүгүн, 14-декабрда премьер-министр Сапар Исаков жол коопсуздугун сактоо боюнча түзүлгөн комиссиянын жыйынында билдирди.

“Ар бир кызматкерге бирден планшет берилет. Азыркыдай унаанын үстүнөн протокол толтуруу болбогон иш жана ыңгайсыздыкты жаратат. Аталган башкармалыктын кызматкерлери планшет менен жол кыймылын бузган айдоочунун аты-жөнүн текшере алышат. Айдоочунун ким экендигин жазып эле ал тууралуу өздөрүнө керектүү бардык маалыматтарды ала алышат. Ошондой эле планшеттер менен протокол толтуруу да оңой болот. Айдоочунун аты-жөнү менен айыбын жазганда ал жакта протокол автоматтык түрдө толтурулат”, - дейт Сапар Исаков.

Андан сырткары өкмөт башчы Ички иштер министрлигине канча санда планшеттер керек экени тактоону тапшырып, ага керектүү суммада акча бөлүнөрүн айтты.