Гарет Бэйлдин голу "Реал Мадрид" клубун клубдар арасындагы Дүйнө чемпиондугунун финалына чыгарды

Испаниялык "Реал Мадрид" футболдук клубу клубдар арасындагы Дүйнө чемпиондугунун финалында бразилиялык "Гремио" футболдук клубу менен беттешет. Бул тууралуу чет элдик басылмалар жазып чыгышты.

Маалыматка ылайык, Бириккен Араб Эмираттарынын Абу-Даби шаарында өтүп жаткан мелдештин жарым финалында испаниялык "Реал Мадрид" клубу жергиликтүү "Аль-Жазира" клубу менен беттешип 2:1 эсебинде жеңишке жетти.

Анда 41-мүнөттө "Аль-Жазира" клубунун оюнчусу Ромариньонун голуна Зинедин Зидандын шакирттери 53-мүнөттө Криштиану Роналдунун таамай соккусу менен жооптук голду киргизди.

Оюндун аягына 10 мүнөт калганда "Реалдын" оюнчулары чабуулга чыгып, Гарет Бэйлдин голу менен оюнга чекит койду.

Муну менен "Реал Мадрид" клубу финалга чыгып, эми "Гремио" футболдук клубу менен беттешет.

Ал эми 3-орун үчүн беттеште "Аль-Жазира" клубу мексикалык "Пачука" футболдук клубу менен кез келет.