Уюштуруучулар: "III Дүйнөлүк көчмөндөр оюндары буга чейин өткөрүлгөн оюндардан олуттуу айырмаланат"

2018-жылы өтө турган Дүйнөлүк көчмөндөр оюндары буга чейин өткөрүлгөн оюндардан олуттуу айырмаланат. Мындай маалыматты бүгүн, 15-декабрда "Ала-Арча" мамлекеттик резиденциясында 2018-жылы өтө турган III Дүйнөлүк көчмөндөр оюндарынын презентациясында оюндардын уюштуруучуларынын бири Алтынбек Максүтов билдирди.

Анын айтымында, 2018-жылы өтө турган lll Дүйнөлүк көчмөндөр оюндарынын өзгөчөлүктөрү биринчи жана экинчи оюндарга окшош болбойт.

"Дүйнөлүк көчмөндөр оюндары деп аталгандыктан Кыргыз өлкөсүнүн гана эмес, дүйнөдөгү бардык көчмөндөрдүн жашоосун жана тарыхын чагылдырууга даярдык көрүүдөбүз. Үчүнчү оюндарга даярдык биринчи жана экинчи оюндарга караганда өзгөчө болмокчу. Бул ирет ат майданда дагы Кырчын жайлоосунда дагы даярдык жакшы болот. Эртерээк бюджетти толуктап, мурун баштан өткөргөн кемчиликтердин баарын жоюп, башкача кооздукта өткөрөбүз. Биз ойлоп жаткан максаттарыбыз ишке ашса, Кыргыз өлкөбүздүн аброю жогорку деңгээлге өсөт. Буга чейин Дүйнөлүк көчмөндөр оюндарынын ачылыш аземинин театралдаштырылган бөлүгүнө Кыргыздар гана катышса, эми lll көчмөндөр оюндарында чет өлкөдөн келген коноктор дагы катышат. Ат майданда өтө турган ачылыш аземинде биз Дүйнөлүк көчмөндөрдүн сүрөттөлүшүн көргөзсөк, Кырчын жайлоосунда нукура Кыргыз көчмөндөрү кандай болгонун чагылдырууну пландап жатабыз. Иш-чаранын өзгөчөлүктөрү азыр сүйлөшүлүп жатат. Анын алкагында жаңы сценарийлер түзүлүүдө. Ал эми коюлган талаптар абдан күчтүү. 6 айдан бери даярданып жатабыз, мелдеш башталарына бир жылдан аз убакыт калды, үлгүрүү аракетиндебиз", - деди Алтынбек Максүтов.