Депутат: "Бишкек ЖЭБге жумшалган 386 миллион доллар насыя жыйынтыкты берген жок. Эми аны эл төлөп жатат"

"Бишкек Жылуулук электр борборуна алынган насыя биз күткөн жыйынтыкты берген жок", - деди бүгүн, 18-декабрда Жогорку Кеңештин тармактык комитетинин жыйынында депутат Айнуру Алтыбаева.

"Татыксыз башкаруучу, тармакты ылайыксыз башкаруу деген түшүнүк бар. Бишкек ЖЭБге берилген насыя абдан талкуу жараткан. Биз, Жогорку Кеңештин депутаттары толук колдоп бердик эле, бирок силер "бул оңдоп-түзөөлөрдөн кийин жаңы мештер курулуп, ал жерде толук өзүбүздүн көмүр иштетилет" деп убада бергенсиңер. Эми ушунча ири көлөмдөгү акча салынгандан кийин дагы деле Казак көмүрүнө болгон көз карандылык бар экени белгилүү болуп жатат. Биз салган акчалар кумга сиңип кеткендей эле болду. Чоң акча кетти. Бирок биз күткөн натыйжаны ала алган жокпуз", - деди Алтыбаева.

"Биздин эки ири насыядан кийин деле электр энергиясына болгон баалар арзандаган жок. Шаардын жылуулук системинин жакшырышына деле жетишкен жокпуз. Мен сиздерди чакырат элем, насыя алганда кийин жыйынтыгын бере турган иштерге көңүл бурсаңыздар", - деп кошумчалады депутат.

Депутат Үмбеталы Кыдыралиев "бул элге берилип жаткан тарифке кредиттик төлөмдөр да киргизилгенби?" деп сурады. Ага Өнөр жай, энергетика жана жер казынасын пайдалануу мамлекеттик комитетинин төрагасынын орун басары Азамат Оморов "ооба" деп жооп берди.

Белгилей кетсек, 2013-жылы ЖЭБге оңдоп-түзөө үчүн Кытайдан 386 миллион доллар каражат 20 жылдык мөөнөткө насыя иретинде берилген.