Депутат: "Мумияны жерге берүү боюнча шашылыш чечим кабыл алган кызмат адамдарынын жоопкерчилигин кароо керек"

"Мумияны жерге берүү боюнча шашылыш чечим кабыл алган кызмат адамдарынын жоопкерчилигин кароо керек", - деп бүгүн, 18-декабрда Жогорку Кеңештеги социалдык маселелер, билим берүү, илим жана саламаттыкты сактоо комитетинин жыйынында мумия боюнча депутаттык комиссиянын мүчөсү Алмазбек Токторов билдирди.

"Мумиянын музейден чыгарылышы боюнча илимий негиздеме жок. Аны жерге берүү чечими шашылыш кабыл алынган. Эми аны кайра казып алуу маселесин кылдат караш керек. Ошондуктан УКМКдан жана Илимдер академиясынан маалымат алышыбыз керек", - деди депутат.

Токторов диний көз караштагы өкмөттүк эмес уюм мумияны жерге берүү талабын койгонун кошумчалап, бул багытта муфтияттан маалымат алынганын кошумчалады.

"Мусулмандар дин башкармалыгы катта көрсөтүп жатат. Шариат боюнча жерге берилбеген дене эч кандай табигый коркунучтарды чакырбайт. Бирок аны жерге берүү зарыл", - деп окуду Токторов.

Депутат Тарых музейинин жетекчилигинин кайдыгерлигинен жалгыз мумия эмес, бир канча тарыхый экспонаттар жоголгонун кошумчалады.

Айта кетсек, Бишкек шаарындагы Мамлекеттик тарых музейинде экспонат катары сакталып турган мумия 14-октябрда Баткен облусунун Кара-Булак айылындагы Мактым-Гөр деген жерге коюлган. Окумуштуулардын айтымында, белгисиз кыздын мумиясы 1959-жылы Баткен аймагынан табылган. Кийинчерээк көмүлгөн жеринен казып алынып, Бишкектеги Тарых музейине өткөрүлгөн.

Маданият, маалымат жана туризм министрлиги аталган мумия тарых музейинде 60 жылдан бери тургандыгын, бирок бул убакыт аралыгында бир дагы жолу илимий изилдөө жүргүзүлгөн эместигин билдирген. Буга изилдөөчү жабдыктар менен антропологдордун жоктугу себеп болгон. Бирок мумия көмүлгөнү менен, кийин аны изилдөө керек болуп калса мүмкүнчүлүк бериле тургандыгын кошумчалаган аталган мекемеден.