Балыкчы-Корумду унаа жолун салган 500 жумушчу 5 айдан бери айлык ала элек

Балыкчы-Корумду унаа жолунун курулушу токтоду, 500 жумушчу 5 айдан бери айлык ала элек. Мындай маалыматты бүгүн, 20-декабрда өткөн маалымат жыйында "Лонг-Хай" компаниясынын жумушчулар тобунун жамааттык кошуунунун жетекчиси Бейшекадыр Сарыбаев билдирди.

Ал белгилегендей, Балыкчы-Корумду унаа жолунун курулушуна жарыяланган тендерди кытайлык "Лонг-Хай" компаниясы утуп алган.

"Биз Жаңы жылдын алдында бийлик өкүлдөрүнө акыркы үмүтүбүз менен кайрылып жатабыз. Бизди өкүндүргөнү акыркы 5 айдан бери айлык акыбызды ала албай келебиз. Биз компаниянын жетекчилигине оозеки түрдө кайрылганбыз, алар бизге мамлекет компанияга акча каражат которбой жатканын билдиришти. Бизге министрлик жана компания тарабынан эч кандай түшүнүктүү жооп бериле элек", - дейт Сарыбаев.

Ошондой эле Балыкчы-Корумду жолунда жумуш кайра качан баштала тургандыгы тууралуу жумушчуларга такыр маалым эмес экендигин кошумчалады.

Эскерте кетсек, 29-ноябрда премьер-министр Сапар Исаков Балыкчы-Корумду жолун оңдоо иштери токтотулганын, 2017-жылы бул долбоорго каражат каралган эместигин билдирген. Ошондой эле ал "Лонг Хай" компаниясынын жумушчуларына карыздар бар экенин кошумчалаган.