Жанар Акаев: "100 күндө өкмөт эч нерсе жасай алган жок, карапайым калк сезе турган бир да реформа ишке ашкан жок"

Бүгүн, 21-декабрда Жогорку Кеңештин жалпы жыйынында Улуттук банктын төрагалыгына Толкунбек Абдыгуловдун талапкерлиги каралды. Депутат Жанар Акаев өкмөттө кадрлардын тынымсыз кызмат которушун "жоопкерсиздик" деп атады.

"Мен жалпы өкмөттүн кадр маселеси тууралуу айткым келет. Кыргыз өкмөтүнүн тарыхында кадрларга мындай жоопкерчиликсиз мамиле жасаган өкмөт башчы болбосо керек. Ай сайын кызматкерлерди ал жактан бул жакка которот. Өкмөттүн тагдыры мындай болбошу керек. Реформатор жаш кадрлар келди дедик эле бүгүн алардын баары бир-эки айга жетпей кетип жатат. Кайра тажрыйбалуу кадрларды парламенттен алып кетип жатат. Жакында өкмөт башчы маалымат берип жатып "100 күн биздин ишибиз өкмөттүн иши менен таанышууга кетти" дейт. Өкмөт андай болбошу керек, даяр программа менен иштейбиз деп келиши керек", - деди Акаев.

"Бүгүн өкмөттүн "Жаңы доорго 40 кадам" программасынын бир кадамы да ашкан жок. 100 күн өттү, бүгүнкү өкмөт келгенден бери карапайым калк сезе турган бир да реформа ишке ашкан жок. Бир да жакшы жылыш жок азыр. Андан жөн эле чыгып алып өздөрүнө өздөрү пиар жасайт. Ошондо мамлекеттик каналдан чыгып, "мына жаштар келди" деп ар бирине токтолуп айтышкан. Элдин үмүтү азыр жаштарда. Бүгүнкү иштер элдин башка жаштарга болгон үмүтүн да өчүрүп койбошу керек. Реформа десе биз эми акырындык менен реформа жүргүзөбүз дейт. Дүйнөлүк практиканы карагыла, реформа жасаган өлкөдө "акырындык менен секин секин" деген түшүнүк болбойт. Реформа деген катуу, ыкчам жасалышы керек. Эл аны сезгендей болушу керек", - деп кошумчалады Акаев.