Кыргыз өлкөсүнүн жүк ташуучу компаниялары ЕАЭБде атаандаштык жарата албай жатканы айтылды

Кыргыз өлкөсүнүн жүк ташуучу компаниялары Казакстан жана Беларустун компанияларына атаандаштык жарата албай жатат, чет өлкөлүк ишканалар өлкөдөгү жүк ташуу тармагынын жарымын ээлеп алды. Бул тууралуу бүгүн, 21-декабрда Бизнести өнүктүрүү жана инвестиция боюнча кеңешменин жыйынында Жүк ташуучулар ассоциациясынын жетекчиси Темирбек Шабданалиев билдирди.

"Акыркы 15 жылдагы өкмөттүн саясаты жеке ишкерликке багытталып, ошону менен катар жүк ташуучу компаниялар да ушул багытта өнүгүштү. Бирок алардын көпчүлүгүндө 1 эле унаа бар, өзү айдоочу, компаниянын жетекчиси да өзү, анысы аз келгенсип эч бир тараптан колдоо да жок. Буга байланыштуу алар казакстандык, беларустук чоң компаниялардын алдында алсыз, атаандаштыкта туруштук бере алышпайт. Учурда Кыргыз өлкөсүнө жүк ташуунун тең жарымын да алар ээлеп алышкан. Бул абалга жараша чаралар көрүлүп, изилдөөлөр жүргүзүлүүсү керек", - деди Шабданалиев.

Андан сырткары ал учурда өлкөдө жүк ташыган 120дай компания бар экенин кошумчалады.

Ал эми премьер-министр Сапар Исаков аталган маселе караларын айтып, жергиликтүү жүк ташуучу компанияларга чет элдик компаниялар менен бирдей шарт түзүлүүсү керек экенин билдирди.