Депутат: "Балдарга сүйүнчү пул боюнча мыйзам шайлоо алдындагы көз боёмочулук болгон"

Бүгүн, 21-декабрда Жогорку Кеңештин жыйынында балдарга мамлекеттик жөлөк пул, сүйүнчү пул боюнча мыйзам долбоору каралып, талкуусу жок добуш берүүгө жиберилди. Бул чечимден кийин эл өкүлдөрү эки жаатка бөлүнүп кайым айтышты.

Депутат Рыскелди Момбеков жөлөк пул боюнча мыйзамды шайлоо алдындагы көз боёмочулук болгонун айтты.

"Кээде депутаттар популист, кээде артист болот экенбиз. Саясаттын сапары ушул экен. Ушул мыйзам бул жерде кабыл алынып жатканда бүт баарыңар "Ура-а" дегенсиңер. Үч эле киши "каршы" деп добуш бергенбиз: Бокоев, Бекешев жана Момбеков. Эми жоопкерчиликтин баарын өкмөткө айтып жатасыңар. Туура ушул жерде өкмөт унчукпай отурган. Министр, сиз ошондо 30 миң бала жөнүндө ооз ачкан эмессиз. Бүгүн келип алып ооз ачып, бизди шүмшүк көрсөтүп жатасыз. Сиз бүгүн жоопкерчиликти алып кызматтан кетишиңиз керек!

Экинчиден, мыйзам башында этеги, эсеби башы жок келген. Мен ошондуктан каршы добуш бергем. Бул шайлоо алдындагы көз боёмочулук болгон. Бул мыйзам байлар үчүн болгон, кедей-кембагалдардын балдарына каралган эмес. Депутаттын, министрдин, губернатордун балдары жөлөк пул алсын деген. Жөлөк пулду карапайым элдин калың катмарындагы эл алышы керек. Шайлоонун алдына шардана кеп кылдыңар, мактана кеп кылдыңар, бүгүн болсо актанып жатасыңар. Уят да! Үч ай да аз, алты айдын ичинде өкмөт иштеп чыгыш керек. Жоопкерчиликти жонуңардан түшүрбөгүлө", - деди Момбеков.

Айта кетсек, "Кыргыз Республикасындагы мамлекеттик жөлөк пулдар жөнүндө” мыйзам долбооруна ылайык, жаңы төрөлгөн балага 4 миң сом жөлөк пул берилери жазылган. Ал эми 3 жашка чейинкилерге ай сайын 700 сомдон, үчүнчү баладан баштап 3-16 жашка чейинки балдарга айына 500 сом бериле турганы камтылган. 21-июнда аталган мыйзам 3-окууда Жогорку Кеңеште кабыл алынган. Ал эми ошол кездеги президент Алмазбек Атамбаев 1-августта мыйзамга кол койгон. Мыйзам 2018-жылдын 1-январынан тарта күчүнө кирмекчи.

Бүгүн өкмөт эгер бул мыйзам 2018-жылдын 1-январынан баштап күчүнө кирсе, учурда жөлөк пул алган 30 миңдей бала жөлөк пул албай кала турганын билдирди. Мындан улам өкмөт жөлөк пул боюнча жаңы мыйзамдагы сүйүнчү пулду калтырып, калганы 3 айга чейин бүгүнкү күндө иштеп жаткан мыйзам менен кете беришин сунуштады.