Пакистанда полиция 50 жаштагы киши менен 10 жаштагы кыз никесин каттап жатканда токтотуп калды

Пакистандын Синд провинциясынын Кирпи айылында полиция өспүрүм кызды күйөөгө берүүдөн сактап калды. Чет элдик маалымат булактарында жазылгандай, Житмал Мегар аттуу 50 жаштагы киши 10 жаштагы кызга үйлөнүү үчүн анын ата-энесине алдын ала калың иретинде 7 миң долларга жакын акча берген.

Боло турган үлпөт тууралуу билген жергиликтүү полиция алардын никесин каттап жаткан кезде имаратка кирип барышкан. Бирок 50 жаштагы үйлөнмөкчү болгон адам качып кетүүгө үлгүргөн.

Кыздын апасы Масмат Набиат полицияга кызын эрте турмушка узатууга мажбур болгондугун айтып берген. Анын айтымында, күйөөсүнө операция жасатышкан, ал үчүн карызга акча алып, аны төлөө үчүн кызын өзүнөн 40 жаш улуу кишиге, өспүрүм кезинде турмушка узатууга макул болгон.

"Менин күйөөм ооруп калганда абдан кадыр-барктуу адамдардан карызга акча алганбыз. Мен да, күйөөм да кызыбызды эрте күйөөгө берүүнү каалаган эмеспиз, бирок биздин андан башка жолубуз жок болду. Кызыбызга үйлөнө турган адам бизден эч кандай сеп талап кылбай тургандыгын, үйлөнүү үлпөтүн да өзү өткөрө тургандыгын айткан", - деген 10 жашар кыздын апасы.

Ал эми өспүрүмгө үйлөнмөкчү болуп жаткан адамдын нике каттоосуна күбө болуп жаткан досу ал кыздын жаш курагы тууралуу билбегендигин айткан. Учурда өспүрүмдү күйөөгө берүүгө катыштыгы бар адамдардын баары убактылуу кармоочу жайга киргизилип, тергөө иштери жүрүп жатат. Пакистандын мыйзамы боюнча, мындай ишке баргандар 3 жылга чейин эркинен ажыратылат.