Каржы министрлиги: "Кыргыздын билим берүү тармагын жакшыртууга Европа 10 миллион евро берүүнү чечти. Акча жакында келет"

Кыргыз мамлекетинин билим берүү тармагын өнүктүрүү үчүн Европа биримдиги гранттык негизде 10 миллион евро берүү чечимин кабыл алды. Аталган каражат өкмөттүн эсебине жакынкы күндөрү келип түшө турганын Каржы министрлигинин маалымат кызматынан билдиришти.

Маалым болгондой, бул гранттык каражаттар окуу китептерин сатып алууга, мектепке чейинки билим берүү системин каржылоого жана бардык мектептерде интернетти орнотууга жумшалат.

Мындан тышкары Европа Биримдиги бюджеттик колдоого кошумча иретинде Каржы министрлигинин, Билим берүү жана илим министрлигинин кызматкерлерине, Билим берүү жана илим министрлигинин алдындагы Коомдук кеңешке саясат маселелери боюнча сунуштарды, техникалык жардамды берет жана алар үчүн окууларды өткөрөт.

Бул каражат өкмөткө 2020-жылга чейин билим берүүнү өнүктүрүү стратегиясын жана 2016-2017-жылдарга иш-аракеттер планын ишке ашырууга көмөктөшө турган жалпы суммасы 36 миллион еврону түзгөн бюджеттик колдоо программасынын бир бөлүгү.

Программанын максаты - жалпы жана кесиптик-техникалык билим берүү системин реформалоого, билим берүүнүн жана педагогикалык стандарттардын сапатын жогорулатууга, ошондой эле мамлекеттик каржыларды башкарууну жакшыртууга көмөктөшүү болуп саналат.