Премьер-министр Бишкектеги ботаникалык бакчанын тегерегиндеги санитардык коопсуздукту сактабаган күркөлөргө тазалоо тапшырмасын берди

Премьер-министр Сапар Исаков Бишкек шаардык ботаникалык бакчанын аймагын калыбына келтирүү жана өнүктүрүү боюнча жумушчу жыйын өткөрдү. Бул тууралуу бүгүн, 25-декабрда өкмөттүн басма сөз кызматы билдирди.

Маалыматка ылайык, өкмөт башчы акыркы жылдары ботаникалык бакчадагы көйгөйлөргө өзгөчө көңүл бурула баштаганын айтты.

"Мамлекеттик органдарга бакчага тийиштүү көйгөйлөрдү чечүү үчүн сунуштарын айтуу боюнча тапшырма берилген. Биз бакчанын өнүгүшүнө жоопкерчиликтүү чечим кабыл алуубуз зарыл. Ботаникалык бакча баарыбызга керек. Ошондуктан бакчаны кайрадан калыбына келтирип, шаардыктардын эс алуу жайына айлантуу зарыл”, - деди Сапар Исаков.

Эколог Эмил Шүкүров аталган бакча Борбор Азиядагы аянты боюнча чоң бакчалардын бири экенин баса белгиледи. “Бакча өзүнүн аянтын сактап келди, эми биз тараптан туура пайдалануу талап кылынат. Бизде ботаникалык бакча боюнча жогорку деңгээлдеги илимий кызматкерлер бар”, - деди эколог.

Жыйынтыгында премьер-министр Бишкек шаарынын мэриясына тез арада ботаникалык бакчанын айланасындагы санитардык коопсуздукту сактабаган күркөлөрдөн тазалоо тапшырмасын берди.