"Чебурашка жана крокодил Гена" жөнүндө мультфильмдеги ырлардын жаратуучусу композитор Владимир Шаинский дүйнө салды

Белгилүү композитор СССРдин эл артисти, СССР мамлекеттик сыйлыгынын лауреаты Владимир Шаинский 92 жашында дүйнө салды. Бул тууралуу бүгүн, 26-декабрда орус басылмалары жазышты.

Шаинский "Чебурашка жана крокодил Гена" жөнүндө мультфильмдеги жана башка бир топ белгилүү ырларды жараткан.

Ал 1925-жылы 12-декабрда Киевде туулган. Киевдеги музыкалык консерваторияда билим алып, 1941-жылы Экинчи дүйнөлүк согуштун кесепетинен Ташкент шаарына эвакуацияланган. Шаинский Ташкенттеги музыкалык консерваторияда билимин улантып, кийин аскер кызматына аттанган. 1945-жылы Шаинский Москвадагы консерваторияга тапшырып, аны аяктагандан кийин Леонид Утесов оркестринде эмгектенген. Кийин музыкалык мектепте мугалим, оркестрщик, композитор, түрдүү эстрадалык оркестрлерде музыкалык жетекчи болуп иштеген. Анын биринчи чоң ийгилиги 1968-жылы жазылган "Лада" композициясы болгон. 1970-жылдарда Шаинскийдин аты белгилүү советтик композиторлордун катарында атала баштаган.

Шаинский балдар үчүн жаралган ырлары менен белгилүү. Ал бир канча чыгармаларын кинодо жана мультфильмдерде балдар дүйнөсүнө арнаган.