"Түндүк электр" ишканасы: "Талас жана Чүй облусундагы авариялык өчүрүүлөр кечке чейин калыбына келтирилет"

26-декабрдан 27-декабрга караган түнү калың кар түшкөндүгүнө байланыштуу "Түндүк электр" ишканасы тарабынан Чүй облусундагы Токмок шаарынын, Чүй, Ысык-Ата, Аламүдүн, Сокулук, Жайыл, Москва, Панфилов райондорунда жана Талас облусундагы Манас, Кара-Буура райондорунда электр жарыгы өчүрүлгөн. Аталган ишкананын директору Искендер Кадыркулов авариялык өчүрүүлөр кечки убакытка чейин кайра калыбына келтирилерин Бишкекте өтүп жаткан маалымат жыйында билдирди.

Анын айтымында, Аламүдүн районунда эле 25 авариялык өчүрүү болду.

"Өзүңүздөр билгендей, 26-декабрь күнү жамгыр жаап, андан кийин кар жаагандыктан электр зымдарына муз тоңуп калган. Катуу шамал болгондо электр зымдары үзүлүп кеткен учурлар катталды. Учурда ар бир райондо өчүрүүлөрдү калыбына келтирүү боюнча бригадалар иштеп жатат", - деди Кадыркулов.