Кыш мезгилинде калктын 65-70 пайызы электр энергиясы үчүн 77 тыйындан, калганы 2 сом 16 тыйындан төлөйт

Электр энергияны 700 киловатт саатка чейин пайдалангандар ар бир киловатт саатына 77 тыйындан, андан ашырып колдонсо 2 сом 16 тыйындан төлөшөт. Улуттук энергохолдингдин башчысы Айбек Калиевдин 27-декабрда өткөргөн маалымат жыйынында журналисттердин суроолоруна жооп берип жатып калктын 30-35 пайызы кыш мезгилинде электр энергияны 700 киловатт сааттан ашык пайдалана тургандыктарын айтты.

Ал эми Өзбекстанга 4 ай аралыгында экспорттолчу 550 миллион киловатт электр энергиясынын 1 киловатт сааты 2,4 центке баалана турганын кошумчалады.

"Токтогул суу сактагычын майнаптуу пайдалануу максатында 2018-жылы электр энергиясын Өзбекстанга жеткирүү боюнча 2017-жылы келишим түзүлгөн. Келишимдин негизинде 2017-жылдын декабрь айынан баштап 2018-жылдын март айына чейин Өзбекстанга 550 миллион киловатт электр энергиясы экспорттолот. 1 киловатт 2,4 центке бааланат", - деди Калиев.