Садык Шер-Нияз: "Сүйүнчү пул бай же кедейге карабай, бардык ымыркайларга берилиши керек"

Бүгүн, 27-декабрда Жогорку Кеңештин жыйынында балдарга жөлөк пулду берүү мөөнөтүн 3 айга жылдырууга багытталган мыйзам долбоору 2 жана 3-окууда каралды. Анда биринчи вице-премьер-министр Аскарбек Шадиев "бардык балдарга каралган сүйүнчү пул муктаж үй-бүлөлөрдүн балдары үчүн гана берилиши керек" деген пикирин айтты. Ал эми депутат Садык Шер-Нияз ага жооп кылып, сүйүнчү пул төрөлгөн балага бир гана жолу берилүүчү каражат экенин, аны бай же кедейге карабай бардык үй-бүлөлөргө берүүнүн зарылдыгын белгиледи.

"Сүйүнчү пулду эми биз бөлөт экенбиз. Кембагалдар алат, кембагал эместер албайт. Биринчи кезекте моюнга алышыбыз керек, бул шайлоого карата алынып келген мыйзам болгон. Өкмөт "акча болот, кабыл алып бергиле" дегенде биз колдогонбуз. Демек, бул оюн болгон! Анда биз бир жолу тырмоочту басып алдык, эми ошол тырмоочту дагы басканы жатабыз. Көрсө, өкмөт кембагалдардын үйүндө бала төрөлсө сүйүнөт экен, байлардын же орто жашаган адамдардын үйүндө ымыркай төрөлсө кайгырабы?

Биз сүйүнчү пул деп атап жатабыз. Бул кабыл алган мыйзамыбыз да акыры барып туура эмес болуп чыгат. Бир жолу жаңылдык, жок дегенде ушул мыйзамды туура кабыл албайлыбы? Бул мыйзам бөлүнбөшү керек, бул куру шылтоо. Өкмөт ушундай алдамчылык менен алып келип берип жатат. Биз ага алданып саясат жасап жатабыз. Сүйүнчү пул баарына бөлүнбөй берилиши керек", - деди депутат.

Бир топ талаш-тартыштардан кийин Жогорку Кеңеш мыйзам долбоорун 2 жана 3-окууда добуш берүүгө жиберди. http://www.super.kg/kabar/news/214155/.