Жанар Акаев: "Президент кире калса тура калып кол чаап, сөзүбүздү бөлгөнүбүз туура эмес"

"Президент кире калса тура калып кол чаап, сөзүбүздү бөлгөнүбүз туура эмес", - деп бүгүн, 28-декабрда Жогорку Кеңештин жыйынында кесиптештерине кайрылып депутат Жанар Акаев билдирди.

Ал бүгүн өкмөт мүчөлөрүнүн антын кабыл алган Сооронбай Жээнбеков залга кирип келген учурда сүйлөп жаткан депутаттын микрофонун парламенттин төрагасы өчүрүп койгонун жүйө келтирди.

"Бүгүн жыйындар залына президент келип кетти. Президент менен премьер-министр кирип келгенде биз кесиптешибиздин микрофонун өчүрүп койдук. Парламент өзүбүздү өзүбүз сыйлашыбыз керек. Сөзүнүн жарымынан бөлүнгөнү туура эмес болду. Анткени биз элдин өкүлүбүз, бийликтин негизги бир бутагыбыз.

Президент мырзага деле айтып турса, ал бир мүнөт күтө турмак же президент отургандан кийин деле депутаттын сөзүн аягына чейин уксак болмок. Мындан ары бул кайталанбашы керек. Өлкө башчысы кире калса тура калып кол чаап, сөзүбүздү бөлгөнүбүз туура эмес. Ансыз деле бир аз кадырыбыз кетип жатат. Ушундай учурларга көңүл бурсак деп ойлойм", - деди Акаев.

Белгилей кетсек, президент Сооронбай Жээнбеков Жогорку Кеңештин залына кирип келген учурда депутат Евгения Строкова (КСДП) сүйлөп жаткан.