Дастан Бекешев: "Өлкөдө абанын тазалыгын текшерчү техникалык жабдык керек. 100 миң доллар турат"

Өлкөдө абанын тазалыгын текшерүүчү техникалык бир эле жабдык бар. Бул тууралуу бүгүн, 28-декабрдагы жалпы жыйынында депутат Дастан Бекешев билдирди. Ал Бишкек шаарындагы абанын тазалыгы боюнча маалымат алгандыгын, борбордун жашоочулары бир топ зыяндуу заттар менен дем алып жатканын айтты.

“Бизде абанын тазалыгын текшерип туруучу заманбап жабдуулардан бирөө эле бар. Биз, жалпы эле жарандар аба ырайы сыяктуу эле кандай аба менен дем алып жатканыбызды билип турушубуз керек. Бул маселе чет өлкөлөрдө катардагы эле көрүнүш. Аткаруу бийлиги тиешелүү жабдуулар менен камсыздашы зарыл. Менимче, Курчап турган чөйрөнү коргоо жана токой чарбасы мамлекеттик агенттигинде каражат бар. Мындай жабдуулар 100 миң доллар турат. Гранттарды күтүп отурбастан жабдууларды сатып алышыбыз керек”, - деди Бекешев.