Мушкер Акжол Сулайманбек уулу профессионалдык карьерасындагы кезектеги беттешин өткөрөт

Кыргыз мушкери Акжол Сулайманбек уулу Орусиянын Екатеринбург шаарында өтө турган профессионалдык бокс боюнча мелдешке катышат. Бул тууралуу чет элдик басылмалар жазып чыгышты.

Маалыматка караганда, Кыргыз мушкери Акжол Сулайманбек уулу 13-февралда өтө турган "RCC Boxing Promotions" уюмунун мелдешине катышып, казакстандык Миржан Жаксылыков менен туш келет.

Айта кетсек, Акжол Сулайманбек уулу профессионалдык карьерасында 9 беттеш өткөрүп, бардыгында жеңишке жеткен. Анын ичинен 4 беттеште атаандашын нокаут менен жеңип алган. Ал эми казакстандык мушкер Миржан Жаксылыков 13 беттеш өткөрүп, анын ичинен 10 жолу жеңишке жетип, 3 жолу жеңилүү ызасын тарткан.

Эске салсак, Акжол Сулайманбек уулу Азиянын бокс кеңешинин чемпиондук курунун ээси. Акжол 2-майда Орусияда өткөн "Extra Round 2" мелдеште орусиялык Денис Лашинге туш келип, 8 раунддук тирештин жыйынтыгында упай катыштыгында жеңүүчү аталган.