Жаңы жыл майрамында коомдук коопсуздукту 8 миң 500дөн ашуун милиция кызматкери камсыздайт

Жаңы жыл майрамына байланыштуу Ички иштер министрлиги коомдук тартипти жана коопсуздукту камсыз кылуу боюнча жарандардын өмүрүн, ден соолугун коргоо чаралары күчөтүлгөн негизде жүргүзүлөт. Бул тууралуу аталган министрликтин басма сөз кызматы билдирди.

Маалыматка ылайык, негизги маанилүү жайлар, стратегиялык кайтаруу жайлары коргоого алынат. Милиция кызматкерлери оюн-зоок жайларынын жетекчилиги менен жолугушуп, жарандарга коомдук коопсуздук боюнча түшүндүрүү иштерин жүргүзүшөт.
"2018-жылдын 1-январына чейинки аралыкта ИИМдин өздүк курамы күчөтүлгөн тартипте иш алып барат. Коомдук коопсуздукту камсыздоо үчүн республика аймагында 8 500дөн ашуун милиция кызматкерлери, Бишкек шаарында 2 500дөн ашуун милиция кызматкери иш алып барат. Мындан тышкары өз ыктыяры менен элдик кошуундун мүчөлөрү тартылат. Жаңы жыл майрамын белгилөө үчүн республикабыздын бардык аймактарында милиция кызматкерлери жарандардын коомдук коопсуздугун жогорку деңгээлде камсыз кылууга багытталат. Мас абалында жүрүүгө, спирт ичимдигин жана айнек идишке суусундук алып жүрүүгө, металл идиш алып жүрүүгө тыюу салынат. Бул эрежелерди жарандар тиешелүү деңгээлде сактаса, коомдук тартипти жана коопсуздукту камсыз кылууга ыңгайлуу болот. Жарандар топтолгон жерлерде өзгөчө сак болуп, өзүнүн коопсуздугун унутпаш керек", - деп жазылган маалыматта.